2022-01-27 [03:50 AM]

د وەڵاتێن دیموکراسی یێن فڕە پێکهاتێن نەتەوی و  ئایینی و ئەتنی ، فڕە حزبی پەیدا دبیت ، ئەڤە دبیتە ئەگەرێ دابەشبوونا جڤاکی لسەر هزر و ئایدیولۆژیێن جودا ل هەلبژارتنان دا ، وەدکەت چ لایەنێن سیاسی نەشێن ببنە زۆرینەیا پەرلەمانی بۆ پێکئینانا حکومەتێ ب تاقێ تنێ ، نەخاسمە ئەگەر وەڵات یێ سیستەمکری نەبیت و دەستهەڵاتا سیاسی ل سەرڤەی دەستووری و حەز و ئیرادا خەلکی بیت ، مینا وەڵاتێ ئیراقێ . 

ژبەر ڤێ چەندێ هەمی پێکهاتێن حکومەتا ئیراقا نوو یا پشتی دکتاتۆریەتێ لسەر بنەمایێ نشتیمانی بوویە و پڕانیا پارتیێن خودان کورسی ل جڤاتا نوونەران پشکدار بوونە و دەستهەڵاتا وەڵاتی لسەر پشک پشکانێ بوویە، لێ دڤان هەمی ساڵان دا حکومەتێن ئیراقێ نەشیانە ببنە حکومەتێن حزمەتکرنێ و سەروەریا یاسایێ و ئاڤەدانیێ و دابینکرنا ئێمناهیێ و ....هتد 
ڕەنگە بۆ ساڵێن دەسپێکا ئاڤاکرنا ئیراقا نوو گاڤەکا باش بیت  بۆ ڕێگریکرنێ ل سەرهەلدانا گرۆپ و میلیشیایێن چەکداری یێن دەرڤەی یاسایێ ، لێ دیار بوو وێ ئەزمۆنێ سەرنەگرت و ئیراق بوویە وەڵاتێ چەکدار و میلیشیایێن سەرڤەی یاسایێ و دەستهەڵاتێ و جار جار بووینە بریاردەر ...! ژلایێ ئاشتەوایا جڤاکی و خزمەتکرنا خەلکێ ئیراقێ ژی چ بەرهەم نەبوون و وەڵات بوویە ئێک ژ گەندەلترین و پاشکەفتیترین وەڵاتێن جیهانێ . 

نهۆ ب رێبەریا موقتەدا سەدر ڕێبەرێ ڕەوتێ سەدر کۆ خودانێ مەزنترین لیستا پەرلەمانی یە ، بانگەوزا حکومەتەکا زۆرینە دکەت و لێکتێگەهشتنەکا باش ژی لسەر بابەتی دگەل پێکهاتێن سنی و مەزنترین پارتیا کوردستانی هەیە کۆ پارتی دیموکراتی کوردستانە ، ئەگەر ئەڤ گاڤێن ڤان هەرسێ پێکهاتێن نشتیمانی و هەڤپەیمان و لایەنگرێن وان سەرگرن و حکومەتەکا زۆرینە پێک بهێت ڕەوشا ئیراقێ ژلایێ ئێمناهی و ئاڤەدانی و سەروەریێ دێ بەرەڤ گۆڕانکاریێن زۆر پەرێنی چیت و ڕەنگە هەتا ڕاددەیەکێ باش ژی پشتەڤانیا نیڤدەولەتی ژی هەبیت . 

لێ جهێ پسیارێ یە ئەرێ لایەنێن بەرەیێ دیتر یێن هەتا نهۆ دەستهەڵاتدار و خودان چەک و میلیشیا کو ل هەلبژارتنێن ١٠ێ ئکتۆبەرا ٢٠٢١ تۆشی شکەستنێ بووی دێ بڤێ فەڕامۆشکرنێ ڕازی بن ..؟ ئەگەر ڕازی نە دێ چ کەن ...؟  بێ گۆمان ڕازی نابن و ئەوا پێ چێدبیت دێ کەت ، چونکی هەتا نهۆ دەستهەڵاتدار و بریاردەرێن ئێکێ بوونە ل وەڵاتی و لسەر دەستێ وان وەڵات تۆشی ڤێ گەندەڵیێ و وێرانیێ و نەسەقامگیریێ و داباشبوونا جڤاکی بوویە و هەمی گاڤ و پرۆژێن وان بۆ بهێزکرنا چەکداریێن دەرڤەی دەستهەڵاتا حکومەتێ و بهێزکرنا حزب و قەوارێن خۆ بووینە و سەروەریا وەڵات و دەولەتێ ئێخستیە د دەستێن وەڵاتێن دەرەکی دا ، ژبەر ڤێ چەندێ حکومەتا زۆرینەیا نشتیمانی مەترسیە لسەر پاشەرۆژا وان و دبیت دۆرکەفتنا وان ل دەستهەڵاتێ بگەهیتە ئاسێ تۆڵڤەکرنێ و دادگەهکرنێ ،  هەوڵێن وان یێن دەستپێکی دێ بو پەشێمانکرنا لایەنێن دیتر بیت لسەر پرۆژێ حکومەتا زۆرینە ، ئەگەر سەرنەکەفتن دێ پلانا دوویێ بکار ئینن ئەو ژی تێکدانا رەوشا ئێمناهیا ئیراقێ و گەفێن هێرشێن چەکداری دی دژی حکومەتێ و سازیێن دەولەتێ ، ئەو هێزێن چەکداریێن بۆ ڕۆژەکا وەکی ئەڤرۆ پێک ئینای و چەند ساڵە خەرجیێن بێ هژمار لێ دکەن ، هەر وەکی دبێژن زێرێ زەر بۆ ڕۆژا ڕەشە ،  پشتەڤانیا وەڵاتێ ئیرانێ هەیە چۆنکی هەتا راددەیەکێ باش بەرژەوەندێن ئیرانێ د پارێزن . 

ئەڤ پرۆژێ حکومەتا زۆرینەیا زۆرینەیا شیعی ب رێبەریا موقتەدا سەدر و هەڤپشکێن وان مینا هنگڤینێ سرۆشتی یە بۆ دەردێن ئیراقێ و ئیراقیا ئەگەر د ڕاستگۆ بن ، لێ ئەڤ نگڤینە د کەڤڕەکێ بلند و عاسی دایە و ڕێکا گەهشتنا وی زۆر ب زەحمەتە چۆنکی ئالیێن هەڤدژ ب یێن شیعی و کوردی دێ هەمی رێک و شیانا مەزێخن و ب کارئینن بۆ مانەڤا وان ل دەستهەڵاتێ و پاراستنا بەرژەوەندێن خوو ، بلا ئیراق کاڤل و بێ سەروەری و گەندەڵ و  پاشکەفتی بمینیت ...! ئەگەر گەفێن شەرێ ناڤخۆیی و تێکدانا ئارامیا وەڵاتی و وەڵاتیان بیت ، ئەگەر لایەنێن دۆڕاندی و یێن خودان میلیشیایێن چەکدار هەوڵێن بڤی ڕەنگی بدەن دێ دژی هەرێما کوردستانێ و دەڤەرێن سنە نشین بیت ، چونکی ل دەڤەرێن شیعی کارڤەدانێن جادێ دێ هەبن ، لێ بەرامبەر هەوڵێن وان یێت تێکدار حکومەتا زۆرینە ئەگەر د ئێکگرتی و ئێک بریار بن دێ شێن بسەر هەولێن تێکدەر یێن ناڤخۆیی و دەرڤە زاڵ ببن  و پشتی ماندیبوون و زەحمەتێ دێ گەهنە وی هنگڤینێ سرۆشتی و دەرد و برینێن ئیراقێ چارە و ساڕێژ کەن ، کۆ ئێمناهی و ئاڤەدانی و سەروەریا دەستووری و سیاسی و یاسایی یە .