دانیال هاگاری، گوتەبێژی سوپای ئیسرائیل
	2024-02-04 [04:05 AM]

دانیال هاگاری، گوتەبێژی سوپای ئیسرائیل لە کۆنگرەیەکی ڕۆژنامەوانیدا ڕایگەیاند، سوپای ئیسرائیل لە سەرەتای شەڕی غەززەوە زیاتر لە ٢٠٠ ئەندامی حزبوڵای لوبنانی کە لەلایەن ئێرانەوە پاڵپشتی دەکرێت، کوشتووە و هێرشی کردووەتە سەر ٣ هزار و ٤٠٠ شوێنی پەیوەست بەم گروپە.

گوتەبێژی سوپای ئیسرائیل هەروەها گوتی: ئەو ئامانجانە بریتی بوون لە 120 بنکەی چاودێری، 40 کۆگای چەک، 40 نێوەندی فەرماندەیی لەگەڵ شوێنی گرنگتر‌ی وەک بنکەی ئاسمانی حزبوڵلا بۆ هەڵدانی فڕۆکەی درۆن و کۆگای هەڵگرتنی مووشەکی دژە فڕۆکە.

دانیال هاگاری دەڵێت، سێ فیرقەی سوپا بەدرێژایی سنووری باکوور لەگەڵ لوبنان جێگیرکراون بۆ ئەوەی بۆ ڕووبەڕووبوونەوەی حزبوڵڵا ئامادەبن و حزبوڵڵا لە هەر شوێنێک بێت، ئێمە لەوێ دەبین و لەهەر شوێنێک پێویست بێت، لە ڕۆژهەڵاتی نێوەڕاستدا بەرەوڕووی دەبینەوە.

گوتەبێژی سوپای ئیسرائیل، هەروەها دەڵێت، ئیسرائیل هێرشی کردووەتە سەر ٥٠ ئامانج لە سوریا و گوتی: ئەوەی بۆ لوبنان بەباشی دەزانین بۆ سوریاش پێمان باشە و شوێنەکانی دوورتریش دەگرێتەوە.