|
نڤیسینا : غیاس خالد زێباری پشتی چەند رۆژەکێن دی ئانکۆ ل (10/10/2021) خەلکێ عیراقێ دێ بەرەڤ هەلبژاردنێن گشتی چیت بۆ جڤاتا نوونەرا، ئەو هەلبژاردنێن پێشوەخت یێن ب گڤاشتنێن خەلکێ عیراقا عەرەبی و جەماوەرێ خۆنیشاندەر و نەڕازی ل شێوازێ ئیدارەدان و دەسهەڵاتداریا وەڵاتی کۆ ب ( تەشرینی ) هاتینە ناسین بریار لسەر هاتیە دان .
چونکی گەندەڵی و نەدادوەری و نە سەقامگیری دناڤ عیراقا عەرەبی دا گەهشتە کۆپیتکێ، لەوما ژمارەکا زۆرا خەلکێ عیراقێ نەخاسمە لاو و چالاکڤانان سینگێ خۆ کرە مەتاڵ بەرامبەر فیشەکێن چەکێن هێزێن میلیشیایا و ترسێنەرێن دەنگێن نەڕازی، سەرەڕای گەفێن دژوار و کۆشتن و گرتن و بێ سەرۆ و شوونکرنا ژمارەکا زۆر بەردەوامی دا نیشاندانا .
ڕەنگە ئێک ژ مەبەستێن دەرکرنا یاسایا فڕەبازنەیی بۆ ڤان هەلبژاردنان پەڕەکرنا دەنگێن خەلکێ نەڕازیبوویی بیت ل عیراقێ، لەوما ئەڤرۆ ئەو جەماوەرێ نەڕازیی یێن تەشرینی داخازا هەلبژاردنێن پێشوەخت دکر، ئەڤرۆ زۆربەی وان داخازا باکۆتکرنێ دکەن .
دەربارەی کوردستانێ ژی ڕەنگە هێزێن شۆفینیا عەرەبی وەکی پیلانەک دژی هەرێما کوردستانێ ب تایبەت دەڤەرێن کوردستانی یێن دەرڤەی ئیدارا هەرێما کوردستانێ بکار ئینابیت بۆ پەڕەکرنا دەنگێن کوردستانیا و نەهێلانا مۆرکا کوردستانێ و نەتەوایەتی بتایبەت دژی پارتی دیموکراتی کوردستان، چونکی خەبات و هەڵویست و قوربانیێن پارتی یێن نشتیمانی و نەتەوایەتی و بەڕەڤانیکرنێ ل پاراستن و پێشڤەبرنا قەوارێ هەرێما کوردستانێ جهێ دلگرانیا دوژمن و نەیارا بوونە و پارتی ب جوداخاز و پێشڕەوا پرۆژێ نەتەوی و نشتیمانیێ کوردستانێ دزانن، لەوما هەردەم پیلانێن وان دژی پارتی بوونە .
ژبەرکۆ پارتی ب هێزا جەماوەرێ کوردستانێ و سیاسەتا دۆربین و لێزانینا سەرۆک مەسعود بارزانی بسەر هەمی پیلانێن وان سیاسی و ئابووری و لەشکری زاڵبوویە، پەنا برە بەر پیلانا یاسایا هەلبژاردنا و هەوڵێن کێمکرنا سەنگا پارتی ل عیراقێ ب کێمکرنا کورسیێن پارتی ل جڤاتا نوونەران .
لێ ئیڕادە و هەست و هشیاریا خەلکێ کوردستانێ ڕاستیا ڤان پیلان و پێتڤیبوونا بهێزترکرنا پێگەهێ پارتی ل عیراقێ و دەڤەرێ باش دزانیت .
خەلکێ کوردستانێ دزانیت کۆ هەبوونا پارتی هەبوونا ئازادیێ و کوردایەتیێ و ئارامیێ و دەسکەفتێن نەتەوی و نشتیمانی یە، پارتی و سەرۆک بارزانی تاکە ژێدەرێن وەرگرتنا هەڵویستانە ل کوردستانێ بەرامبەر داگیرکار و تێکدەرێن قەوارێ هەرێما کوردستانێ و شیرازێ جڤاکی ل کوردستانێ و عیراقێ .
لەوما پشتی هەر پیلانەکا دژی کوردستانێ و پارتی، خەلکێ کوردستانێ ب پشتەڤانیەکا زێدەتر ل پارتی بەرسڤا نەیار و نەحەزا دایە .
ئەز باوەرم بۆ هەلبژاردنێن ڤێ جارێ دا خەلکێ کوردستانێ بریار دایە زێدەتر ل جاران کاندیدێن پارتی ڕەوانە جڤاتا نوونەرێن عیراقێ بکەت، چونکی یێ پشتڕاستە کۆ پارتی و نوونەرێن وێ دێ دناڤ دەولەتا عیراقێ دا تاکە فاکتەرێن دابینکرن و پاراستنا ماف و ئارمانجێن وانن و بەختەوەری و ئارامیا جڤاکێ کوردستانێ تنێ د ب پارتی گڕەنتی دبیت، پارتی تاکە هێزا کوردستانی یە یا هەلگرا ستراتیژیەتا بهێزترکرنا کوردستانێ ژلایێ سیاسی و دبلۆماسی و ئابووری و ئێمناهی و جڤاکی .
ئەم هەواڵە 9598جار خوێندراوەتەوە |
