|
نڤیسینا : غیاس خالد زێبارى 11 ێ ئادارێ ئانكۆ رێكه‌فتنا دیرۆكیا 11 ێ ئادارا سالا 1970 دناڤبه‌را بزاڤا رزگاریخوازیا كوردستانى ب سه‌رپه‌رشتیا پارتى دیموكراتى كوردستانێ و رێبه‌ریا مه‌لا مسته‌فایێ رێبه‌ر وسه‌روه‌رێ كوردا ، ده‌ستكه‌فته‌كێ مه‌زن و دیرۆكى بوو بۆ گه‌لێ كورد ب گشتى و خه‌لكێ باشوورێ كوردستانێ ب تایبه‌تى ، چونكى ئه‌ڤ رێكه‌فتنا سه‌ركردایه‌تیا شۆره‌شێ دگه‌ل رژێما وى سه‌رده‌مى یا ئیراقێ ئێكه‌مین به‌ڵگه‌ناما فه‌رمى یا دانپێدانكرنا ده‌وله‌تا ئیراقێ بوو ب پشكه‌كا مافێن سرۆشى و ره‌وا یێن نه‌ته‌وى و نشتیمانیێن كورد و كوردستانیا ، ئه‌و رێكه‌فتنا رژێما ئیراقێ لسه‌ر ڤه‌گه‌راندنا مافێن زه‌فتكریێن خه‌لكێ كوردستانێ ژلایێ ده‌ستهه‌لاتداریا ئیراقێ ب درێژاهیا دیرۆكێ كۆ مافێ ئۆتۆنۆمى بوو .
ده‌مێ دبێژین مافێ ئۆتۆنۆمى، مافێن سیاسى و ئیدارى و كلتۆرى و ره‌وشه‌نبیرى و هۆنه‌رى و په‌روه‌رده‌یى ڤه‌دگریت ، ئه‌گه‌ر ئه‌و رێكه‌فتن وه‌كى خۆ هاتبا بجهــ ئینان بۆ وى ده‌مى جۆره‌كێ فیدرالیه‌تێ بوو ، ئه‌ڤ سیسته‌مێ فیدرالیه‌تا ئه‌ڤرۆ یا ئیراقێ ژ ڤه‌رێژا وێ رێكه‌فتنێ یه .
ره‌زامه‌ندیا ده‌وله‌تا ئیراقێ لسه‌ر وى پرۆژێ سیاسى یێ پارتى دیموكراتى كوردستان و بارزانیێ نه‌مر، ئه‌وێ رێكه‌فتن لسه‌ر هاتیه كرن ، نه ژ ئه‌نجامێ تێگه‌هشتنا رژێم و سه‌ركردێن ئیراقێ بوو ب رێبه‌ریا پارتیا به‌عس ، ل ماف و داخازیێن ره‌وا یێن خه‌لكێ كوردستانێ ، نه‌ژى سۆزداریا وان بوو بۆ خه‌لكێ كوردستانێ و پێكهاتێن جڤاكێ ئیراقێ ب گشتى .
لێ ئه‌ڤ گۆڕینا رژێم و ده‌وله‌تا ئیراقێ بسه‌ركردایه‌تیا پارتا به‌عسا گۆر بگۆر به‌رامبه‌ر پارتى دیموكراتى كوردستان و سه‌رۆكێ نه‌مر مه‌لا مسته‌فاى بارزانى وه‌كى سه‌ركێشێ بزاڤا رزگاریخوازیا كوردستانێ و نوونه‌رێن خه‌لكێ كوردستانێ ژ نه‌چارى هات و ژ ئه‌نجامێ 11 ێ ئیلۆنێ بوو، ئانكۆ ژ ئه‌نجامێ سه‌ركه‌فتنێن مه‌زنێن شۆره‌شا مه‌زنا ئیلۆنێ بوو ب رێبه‌ریا بارزانیێ نه‌مر و سه‌رپه‌رشتیا پارتى دیموكراتى كوردستان ل سالا 1961 ــ 1970 .
چونكى دڤێ ناڤبه‌رێ دا شۆره‌شا مه‌زنا ئیلۆنێ ژ هه‌مى لایه‌كى ڤه گۆڕین مه‌زن ل باشوورێ كوردستانێ درۆستكرن ، ژلایێ له‌شكرى هێزێن پێشمه‌رگه‌هێن شۆڕه‌شێ ب شیانێن سنووردار و چه‌كێ ته‌قلیدى و سڤك داستان و سه‌ركه‌فتنێن مه‌زن لسه‌ر له‌شكرێ زه‌به‌لاح و شیاندار ژلایێ ماددى و چه‌كێ پێشكه‌فتى تۆمار بكه‌ن، كۆ جهێ حیبه‌تیێ بوون و د خه‌یالا چ دوژمنا دا نه‌بوو ، مینا داستانێن زۆزك و هندرین و سه‌فین و ...هتد
ژلایێ په‌روه‌رده‌یى و هشیاریا نه‌ته‌وى و نشتیمانى دناڤ جڤاكێ كوردستانێ گه‌هشته ئاسته‌كێ باش .
ئه‌ڤ پابه‌ندیا هژماره‌كا زۆرا خه‌لكێ كوردستانێ ب گه‌ل و وه‌لاتى و داخازی و تێكۆشان ژ پێخه‌مه‌ت بده‌ستڤه‌ئینانا ماف و ئارمانجێن ره‌وا به‌رى هه‌ر تشته‌كێ بۆ لێزانین و دادوه‌رى و شۆره‌شگێرى و دووربینى و پلان و به‌رنامێن رێبه‌رێ نه‌مر مسته‌فا بارزانى دزڤریت ، چونكى لسه‌ر ده‌ستێ وى خه‌لك هاته هشیاركرن و سه‌ره‌ده‌ریێن وى یێن مرۆڤایه‌تى و شۆره‌شگێرى خه‌لك نه‌چار كر په‌یوه‌ندیێ ب شۆڕه‌شێ بكه‌ت و بێ به‌رامبه‌ر یێ ئاماده‌بیت گیانێ خۆ بكه‌ته قوربانى ئازادیا كورد و كوردستانێ و بجهئینانا بریار و راسپاردێن سه‌رۆك بارزانى و شۆره‌شێ .
دشێین بێژین مۆكومیا باوه‌رداریا خه‌لكێ كوردستانێ ب بارزانیێ نه‌مر كۆ ئه‌و رێبه‌ر و سه‌ركرده‌یه ئه‌وێ تنێ ئارمانجا وى ئازادى و رزگاریا كورد و كوردستانێ و به‌خته‌وه‌ریا خه‌لكێ كوردستانێ یه و هه‌رده‌م پێشمه‌رگه‌هــ ل پێشیا سه‌نگه‌را و هه‌مى ماف و به‌رژه‌وه‌ندێن خۆ یێن تایبه‌ت كرینه قوربانى به‌رژه‌وه‌ندێن گشتى .
شۆڕه‌شا مه‌زنا ئیلۆنێ گرێدانه‌كا هه‌تا هه‌تایى دناڤبه‌را خه‌لكێ كوردستانێ و ئاخا پیرۆزا كوردستانێ دا درۆست كر و بارزانى نه‌مر ژى وه‌كى سه‌ركرده و رێبه‌ر و سۆمبل و كاریزما لسه‌ر ئاستێ جیهانێ دا نیاسین و دناڤ خه‌لكێ كوردستانێ ژى دا بوویه بابێ دیرۆكى و كنیاتى .
پارتى دیموكراتى كوردستان ب هه‌بوونا ڤى سه‌ركردێ مه‌زن و دیرۆكى بوویه پارتیه‌كا جه‌ماوه‌ریا پان و به‌رین و خودان له‌شكره‌كێ رێكخستى و دیسپلین و سه‌ركردایه‌تیه‌كا ئێكگرتى و ئێك بریار كۆ هه‌تا نهۆ هه‌ما پرنسیپ و شێوازه .
رێكه‌فتنا 11ێ ئادارا سالا 1970 ێ یێ به‌رهه‌مى ئێكرێزى و ئێك بریارى و دادوه‌رى و شۆره‌شگێریا شۆڕه‌شا مه‌زنا 11 ێ ئیلۆنا سالا 1961 بوو ب رێبه‌ریا بارزانیێ نه‌مر كۆ ئه‌ڤ سه‌ركه‌فتنا مه‌زن بۆ هه‌تا هه‌تا جهێ شانازیێ یه چونكى دۆزا سیاسى یا كوردستانێ بره قۆناغه‌كا دیتر و لسه‌ر ئاستێ جیهانێ دا نیاسین ، بۆ ئه‌ڤرۆ و داهاتى ژى سه‌ركردایه‌تیا كوردستانى بۆ باوه‌رى و ئێكرێزیا وى سه‌رده‌مى بزڤیت ده‌ستكه‌فتێن مه‌زنتر دێ بده‌ستڤه‌هێن و چ ڤالاهى دناڤبه‌را خه‌لكى و ده‌ستهه‌لاتێ دا نامینن .
ئەم هەواڵە 7507جار خوێندراوەتەوە |
