|
نڤیسینا : غیاس خالد زێبارى لسپێده‌هیا زوی لرۆژا 13 ێ ئادارا 2022 چه‌ند مۆشه‌ك ئاراسته‌ى هه‌ولێرا پایته‌ختێ هه‌رێما كوردستانێ هاتنه‌كرن كۆ بووینه ئه‌گه‌رێ زیانێن ماددى، هه‌ر زۆى رژێما ئیرانێ دانپێدان بڤان هێرشا كرن ، هه‌رچه‌نده پرانیا مۆشه‌كا ل ماڵ و جهێن خه‌لكێ سڤیل كه‌فتینه و زیانێن مه‌زن گاهاندینێ ، لێ رژێما ئیرانێ دیاركریه كۆ هێرشێن وان ئارمانجێن خۆ بجهــ ئینانه كۆ بنگه‌هێن هه‌والگیریا ئسرائیلن(مۆساد) ...! دیاره ب چاڤێن ده‌ستهه‌لاتا ئیرانێ خه‌لكێ سڤیلێ كوردستانێ ئسرائیلى نه ..!
ئه‌ڤ هێرشێن ئیرانێ یێن لسه‌ر هه‌ولێرێ و كوردستانێ دانپێدانا رژێما ئیرانێ یه ب پێگه‌هێ مه‌زن و كاریگه‌رێ هه‌رێما كوردستانێ یه ژلایێ سیاسى و ئابووری لسه‌ر ئاستێ هه‌رێمى و نیڤ ده‌وله‌تى ب سه‌ركێشیا پارتى دیموكراتى كوردستان و سه‌رۆك مه‌سعود بارزانى، چونكى هێرش و پیلانێن به‌رى نهۆ یێن میلیشیا و چه‌كدارێن سه‌ر ب ئیرانێ دژى هه‌رێما كوردستانێ هاتینه شكه‌ستن و ژناڤبرن و شه‌رمزاركرن ، له‌وما په‌نا بره به‌ر ڤێ هێرشا مه‌زن .
ئه‌گه‌ر ئیران راست بێژیت دوژمنا ئیسرائیله ، بلا كه‌ره‌مكه‌ت ئه‌و وێره‌كى هه‌بیت ئێك مۆشه‌ك ئاراسته‌ى ته‌ل ئه‌بیب بكه‌ت چونكى نه‌یا دووره ، یان ژى بلا درێكا میلیشیا و دیڤه‌لانكێن خۆ ل فه‌له‌ستین و لبنان و سووریا هێرش بكه‌ته سه‌ركۆ دناڤ ئسرائیل دانه ، ئه‌ڤه هه‌مى به‌هه‌نایێن بێ بنه‌مانه دژى قه‌وارێ هه‌رێما كوردستانێ و پارتى دیموكراتى كوردستانى، چونكى نه ئسرائیلى ل هه‌رێما كوردستانێ هه‌نه نه‌ژى مۆسادا وان ، به‌رى چه‌ند رۆژان بۆ دیمه‌نێن كه‌سایه‌تیێن ئایینى یێن ئسرائیلى دناڤ باژارێن ئیرانێ هاتنه به‌ڵاڤكرن و ب ئازادى د گه‌ریان ..!
دیاره ئیران هه‌ست ب مه‌ترسیه‌كا مه‌زن ل هه‌رێما كوردستانێ و پارتى دیموكراتى كوردستان دكه‌ت پشتى ب چه‌ندین پیلانێن وان نه‌هاتینه لاوازكرن و رۆژ ب رۆژا پێگه‌هێ وان لسه‌ر ئاستێ ئیراقێ و ده‌ڤه‌رێ و جیهانێ بهێزتر دبیت ، نه‌خاسمه پشتى هه‌لبژارتنێن بوورى یێن ئیراقێ و شكه‌ستنا لایه‌ن و میلیشیایێن سه‌ر ب وان لسه‌ر ده‌ستێ خه‌لكێ ئیراقێ .
ژلایه‌كێ دیتر ب سیاسه‌تا پارتى ده‌ستهه‌لاتا ئیراقێ به‌ره‌ڤ خۆمالیكرنا دچیت ب وێ هه‌ڤپه‌یمانیا دناڤبه‌را پارتى و ڕه‌وتێ سه‌د و سونه‌یێن ئیراقێ، بخۆماڵیبوونا ده‌ستهه‌لاتا ئیراقێ لسه‌ر ده‌ستێ ڤێ هه‌ڤپه‌یمانیێ هێدى هێدى ده‌ستێ ئیرانێ ل ئیراقێ دێ هێته بڕین و دێ تۆشى شكه‌ستنه‌كا مه‌زن بیت ، چونكى ب خۆماڵیبوونا ده‌ستهه‌لاتا ئیراقێ هه‌ژمۆنا ئیرانێ ل ئیراقێ نامینیت ، ئیدى نه‌شێت درێكا دیڤه‌لانك و كرێگرتیێن خۆ سه‌روه‌ت و سامانێ ئیراقێ ببه‌ته ته‌هران و خه‌لكێ هه‌رێما كوردستانێ ژى ب رێكا بڕینا مۆچه و بۆدچێ كوردستانێ برسى بكه‌ت و كاروانێ ئاڤه‌دانى و پێشكه‌فتنا كوردستانێ رابوه‌ستینیت .
ئه‌ڤ هێرشێن ئیرانێ بۆ سه‌ر هه‌ولێرێ ژبلى دوژمنایه‌تیا پارتى و هه‌رێما كوردستانێ چ رامانێن دیتر ناده‌ت و پێشێلكرنه‌كا ئاشكرایا یاسا و رێكه‌فتنێن نیڤ ده‌وله‌تى یه و رێزنه‌گرتنه ل سه‌روه‌ریا ئیراقێ .
ژلایه‌كێ دیتر هێرشێن سه‌ر هه‌ولێرێ هێرشكرنه بۆ سه‌ر ئاخا و گه‌ل و ده‌ستهه‌لاتا ئیراقێ ، له‌وما ده‌ستهه‌لاتا ئیراقێ وهژماره‌كا لایه‌نێن سیاسى و لسه‌ر نیڤ ده‌وله‌تى ژى ئه‌ڤ هێرشه شه‌رمزار كرینه ، لێ پێتڤى یه هه‌لویستێن مه‌زنتر بهێنه وه‌رگرتن و ئه‌ز باوه‌رم ئه‌گه‌ر پێكئینانا حكومه‌تا نوى یا ئیراقێ بێ لایه‌نێن سه‌ر ب ئیرانێ بهێته پێكئینا هه‌لویستێن توند به‌رامبه‌ر ئیرانێ دێ هێنه وه‌رگرتن و ئیران دێ باجا ڤان هێرشێن دوژمنانه و بێ ئه‌گه‌ر ده‌ت .
پارتى و هه‌رێما كوردستانێ ب ڤان هێرشێن ترسنۆكانه لاواز نابیت و پێگه‌هێ وێ لسه‌ر ئاستێ ئیراقێ و هه‌رێمێ و نیڤ ده‌وله‌تى دێ بهێزتر كه‌ڤیت و دێ بنه ئه‌گه‌رێ ئاشته‌وایا جڤاكێ ئیراقێ و پاراستنا سه‌روه‌ریا ئیراقێ .
دووباره دبێژین هێرشێن سه‌ر هه‌ولێرێ دانپێدانا ئیرانێ یه ب مه‌زناهى و كاریگه‌ریا پێگه‌هێ هه‌رێما كوردستانێ ، چونكى كه‌س و لایه‌نێن خۆدان پێگه‌هێن مه‌زن و كاریگه‌ر هه‌رده‌م دبنه نیشان و ئارمانج و پیلانێن مه‌زن بۆ دهێنه دارشتن .
ئەم هەواڵە 6664جار خوێندراوەتەوە |
