|
نڤیسینا:خورشید ئەحمەد سورچی ڕوژهەلاتا ناڤین ئەو دەڤەرا کو هەر ناکۆکیەکا مە بڤێت یا تێدا هەیی، ڕەنگە یا شاش نەبیت کو بێژین پتریا دەولەتێن ئەقلیمی خودان نیزامەکێ سیاسی یێ نە دیموکراسی و مەدەنین، لەوڕا مەترسی لسەر وان هەرێم و کانتۆنان پەیدا دبن کو دناڤ جەرگێ وان دەولەتان دژین، کوردستان ئێک ژوان هەرێمانە کو دناڤ جەرگێ دەولەتەکا نەدیموکراس ئەڤە چەندین سالە مافێن وێ دێ هێنە بن پێکرن.
پشتی کو ب پشتەڤانیا ئەمریکا هەرێم وەک قەوارەکا سیاسی و یاسایی هاتە چارچوڤەکرن د دەستورێ عێراقی دا، ڕێک لپێش هەرێمی ڤەبوون کو جهێ خو ڤەکەت دناڤ هاوکێشێن ئەقلیمی و ناڤدەولەتی و ب چاڤەکێ مەزن بهێتە تەماشەکرن چونکی هەرێم خودان جوگرافیەکا ستراتیژییە ل ڕوژهەلاتا ناڤین.
دڤێرەدا یا فەرە بەحسێ ئەو زلهێزێن ئەقلیمی بکەین کوکاریگەریەکا مەزن یا هەیی لسەر دەڤەرێ و سیاسەتا وێ، ئەوژی (ئیران و تورکیا و ئیسڕائیل و دەولەتێن کەنداڤی)نە، ئیرانێ دگەل هەرێمێ پەیوەندیێن دیتۆکی یێت هەین و هەرگاڤ ب چاڤەکێ مەزن سەحدکەتە هەرێمێ چونکی نێزیکی ٩٠٠ کیلومەترێن سنوری دگەل هەرێمێ هەنە و دبینیت کو هەرێم یا گرێداییە ب ئاسایشا وێڤە، هەروەسا هەرێم سەنتەرەکێ سەرەکیە بو کەلوپەلێن ئیرانی و سالانە ب بهایێ چەندین ملیون دولاران بازرگانی دناڤبەرا هەردوولایان دهێتە کرن، هەروەسا دا ژبیر نەکەین کو عێراق گوڕەپانا ناکۆکیێن مەزهەبی یە لەوڕا ئیران هەرگاڤ پێکولان دکەت کو عێراق ب هەرێمێ ژی ڤە دبن سیهونەیا وێ دابیت، سەبارەت تورکیا ژی د شیان دایە کو تێڕامینا تورکیا و ئیرانێ پێکڤە گرێدەین چونکی تورکیا ژی هەر بڤی ڕەنگی سەحدکەتە هەرێمی ژلایێ هەفسنوریێ و بازرگانیێ و پرسا مەزهەبی و کوردی، ئیسرائیل ئێک ژ نموونەیێن دیە کو هەرێمێ دناڤ هاوکێشێن خودا ب جهەکێ ستراتیژی دبینیت، هەرگاڤ پەیوەندیێت هەرێمێ و ئیسرائیلێ دخوش بووینە، سەبارەت دەولەتێن کەنداڤی پتر ژ ڕوویێ ئابوری و بازرگانی پەیوەندیێت خو خوش دکەن دگەل هەرێمێ بەلێ لڤان دوماهیکان ئەوژی ب مەرەمێن سیاسی ێن پێکولا خو نزیک کرنێ دکەن ژ قەوارێ هەرێمێ.
یا فەرە ئەم بزانین کو هەرێما کوردستانێ د هاوکێشین ئەقلیمیدا ڕولەکێ گەلەک گرنگ یێ هەیی و ب چاڤەکێ مەزن هەرێم دهێتە دیتن چونکی هەرێم خودان جهـەکێ ستراتیژیە و خودان سیاسەتەکا ساخلەمە.
ئەم هەواڵە 673جار خوێندراوەتەوە |
