|
نڤیسینا:نوزاد زادە ڕاستیەکا دیارو بەرچاڤە کو هەبوونا ئابورییەکا سەربەخۆ بنیاتەکێ سەرەکی یێ هەر گەل و قەوارەیەکا ئازاد و خودان ئیرادەیە ، لەوما هەمی هەولێن پارتی دیموکراتی کوردستانێ ل پێناڤ هندێ بوونە کو هەرێما کوردستانێ ژلایێ ئابووری ڤە یا سەربەخۆ بیت و پشتبەستنێ ل سەر داهاتێ خۆ بکەت و پێدڤی ب لایەنێن دەرڤە نەبیت ژێر فشاران دا نەبیت و هەروەها داکو ئابووری وەک چەکەک دژی ئیرادەیا وێ یا ئازاد نەهێتە بکارئینان ، کو سەرکردایەتیا پارتی دیموکراتی کوردستانێ ب سیاسەتا خۆ یا حەکیمانە هەر زووی هزرا شوفینی یا لایەنێن دەستهەلاتێ یێن حکومەتا عێراقێ دزانی کو سەرەرای گوهرینا رژێمێ بەلێ ئەو لایەن هەر خودانێ وێ هزرا رژێما بەرێ یا شوفینی نە .
ل ساڵا 2014 حکومەتا عێراقێ برینا بودجە و شایستەیێن دارایی وەک چەکەکێ ئابووری دژی هەرێما کوردستانێ بکارئینا ، پشتی برینا بودجەی حکومەتا هەرێما کوردستانێ دەست ب سیاسەتا ئابوورییا سەربەخۆ کر ، نەفتا هەرێمێ هاتە فروتن و ب ڤێ چەندێ جهێ هەرێما کوردستانێ ل سەر نەخشێ وزەیا جیهانێ دیاربوو ، سەرەرای وان هەمی ئاستەنگێن ناڤخویی و دەرەکێ کو ب هەمی شێوەیەکی پیلان هاتنە دانان و ئاستەنگ و رێگری هاتنەچێکرن ، لێ حکومەتا هەرێمێ بۆ ماوەیێ (9) ساڵان شیا نەفتێ ب فرۆشیت د سەردەمەکێ گەلەک نەخوش و بەرتەنگ دا کو ژبلی دابینکرنا مووچە و پرۆژەیان شەڕی تیرۆرستێن داعش ژی هەبوو کو ڤی شەڕێ دژوار پێدڤی ب مەزاختنێن گەلەک مەزن هەبوو ، ئەگەر د وی سەردەمی دا حکومەتا هەرێمێ نەفت نەفرۆشتبا، مەترسیا نەمانێ دا کەڤیتە سەر قەوارەیێ هەرێما کوردستانێ .
ل ماوەیێ ڤان ساڵان دا هندەک حزب و لایەنێن کوردی بەردەوام پیلان گێران دژی ئابوورییا سەربەخۆ و پرۆپاگەندە دکرن و د ڕاگەهاندنان دا دگوتن ئەگەر ئابورییا سەربەخو نەمینیت و مەرجێن بەغداد بهێنە جێبەجێکرن مە چ کێشەیەک نامینیت ، لێ پشتێ بریارا دادگەها ناوبژیوانا دادگەها پاریس کو بوو ئەگەرێ راوەستاندنا هنارتنا نەفتا هەرێمی بۆ دەرڤە و جێبەجێکرنا حکومەتا هەرێما کوردستانێ بۆ هەمی مەرجێن بەغدا ، نە ڕاستی و بێ بنیاتیا پرۆپاگەندەیێن ڤان لایەنان زێدەتر دیاربوو کو سەرەرای جێبەجێکرنا مەرجان بەلێ حکومەتا عێراقێ یا ڕازی نینە ب هنارتنا بودجەیێ هەرێما کوردستانێ کو مافەکێ یاسایی و دەستوری یێ گەلێ کوردستانێ یە کو مەرەما حکومەتا عێراقێ ل ڤێ چەندێ ژی دژایەتیا مافێن ڕەوا گەلێ کوردستانێ و نەمانا قەوارەیێ هەرێمێ یە .
ل دوماهیێ دبێژین پشتەڤانیکرنا پارتی دیموکراتی کوردستان ل هەر سیاسەت و بریارەکێ ل پێناڤ بەرژەوەندیێن گەلێ کوردستانێ بوویە چونکە پارتی خودانێ ڕاستەقینە یا بزاڤا رزگاریخوازا گەلێ کوردستانێ یە و هەمی کار و بزاڤێن وێ ل پێناڤ کوردستانەکا ئازاد و خودان ئیرادەیە.
ئەم هەواڵە 574جار خوێندراوەتەوە |
