2023-09-19 [04:21 AM]

فەرمانگەی میدیا و زانیاریی حكوومەتی هەرێمی كوردستان، لە ڕاگەیاندراوێكدا ئاماژە بەوە دەدات، سێ ئۆتۆمبێلی زرێپۆش (گوللـەنەبڕ)ی ئەنجوومەنی وەزیرانی هەرێمی كوردستان دەخرێنە زیادکردنی ئاشکراوە.

ئەمڕۆ سێشەممە 19/9/2023، فەرمانگەی میدیا و زانیاری، ڕاگەیاندراوێكی بڵاو كردووەتەوە و تێیدا هاتووە: "بەپێی فەرمانی سەرۆکایەتیی ئەنجوومەنی وەزیران، کە لە 29/8/2023 بڵاوی کردووەتەوە، لیژنەى فرۆشتن لە سەرۆکایەتیی دیوانی ئەنجوومەنی وەزیران، سێ ئۆتۆمبێلی جۆرى لاندکرووزەرى زرێپۆش (درع)، لە ڕۆژى دووشەممە 2/10/2023، لە کاتژمێر 12ـى نیوەڕۆ لە هۆڵی یەکى شوبات دەخاتە زیادکردنی ئاشکراوە."

ئەم ئاگادارییەدا ئەم مەرجانەشی بۆ بەشداریکردن لە زیادکردنەکەدا خستووەتە ڕوو:

- دانانی چەکی پەسندکراو بە بڕی 26 ملیۆن و 400 هەزار دیناری عێراقی.
- ڕسوومات و خەرجیی ئەم ئاگادارییە دەکەوێتە ئەستۆى ئەو بەشداربووەى زیادکردنەکەى بۆ دەردەچێت.
- فرۆشتنی ئۆتۆمبێلەکان بە شێوەى نەختینە (نەقدی) دەبێت و دینارى عێراقی بەکار دێت.
- دەبێت بەشداربوو مۆڵەتی ڕێگەپێدانی بەکارهێنانی ئەو جۆرە ئۆتۆمبێلانەى هەبێت لەلایەن وەزارەتی ناوخۆوە.