|
هەولێر – ZNA وتووێژی میدیاکار مەنسوور جیهانی له‌گه‌ڵ ته‌له‌ڤیزیۆنی "فرانس 24" سه‌باره‌ت به فێستیڤاڵی نێوده‌وڵه‌تی فیلمی کانی فه‌رە‌‌نسا به زمانه‌کانی ئینگلیزی و چینی له ده‌زگاکانی راگه‌یاندنی کیشوه‌ری ئاسیادا ره‌نگدانه‌وه‌ی هه‌بوو.
مەنسوور جیهانی لەبارەی فێستیڤاڵەکە رایگەیاند: فێستیڤاڵی نێوده‌وڵه‌تی فیلمی کان له وڵاتی فه‌ر‌‌نسا به ناونیشانی گرینگترین رووداوی سینه‌مای دنیا هه‌میشه گرینگییه‌کی تایبه‌تی به سینه‌مای کوردستان و ئێران داوه و پێگه‌یه‌کی تایبه‌تی بۆ ته‌رخان کردوون. به‌رچاوترین سینه‌ماکاری ئێرانی ڕه‌وانشاد عه‌باس کیارۆسته‌می به فیلمی سینه‌مایی "تامی گێلاس" به وه‌رگرتنی خه‌ڵاتی به‌نرخی چڵه‌خورمای زێڕین و ده‌رهێنه‌ری ناوداری کورد"به‌همه‌ن قوبادی" به فیلمی سینه‌مایی "کاتێک بۆ مه‌ستی ئه‌سپه‌کان" و به وه‌رگرتنی خه‌ڵاتی کامێڕای زێڕین و سینه‌ماکارانی به‌ناوبانگی ئێرانی له‌وانه؛ ئه‌سغه‌ر فه‌رهادی، جه‌عفه‌ر په‌ناهی، محه‌ممه‌د ره‌سووڵ ئۆف و ... دوای به‌شداری له فێستیڤاڵی نێوده‌وڵه‌تی فیلمی کانی فه‌ره‌نسا و وه‌رگرتنی خه‌ڵاتی به‌شه جۆراوجۆره پێشبڕکییه‌کان به سینەمای جیهان ناسێندران.
جیهانی له درێژه‌ی قسه‌کانیدا گوتی: هه‌موو ساڵیک، نوێترین به‌رهه‌می سینه‌ماکارانی به‌رچاوی ئێرانی بۆ به‌شداری له فێستیڤاڵی نێوده‌وڵه‌تی فیلمی "کان" ره‌وانه ده‌کرێن و بۆ یه‌که‌مین جار، هۆگران و لایه‌نگرانی هونه‌ری سینه‌ما، ڕۆژنامه‌نووسان، ڕخنه‌گران، نووسه‌ران و به گشتیی ستافی سینه‌مای جیهان له میانه‌ی ئه‌م ڕووداوه گرینگه سینه‌ماییه‌دا سه‌یری ئه‌م به‌رهه‌مانه ده‌که‌ن و له لایه‌ن ئه‌ندامانی لێژنه‌ی دادوه‌رانی به‌شه جۆراوجۆره‌کانه‌وه هه‌ڵده‌سه‌نگێندرێن و به وردی و به جوانی دادوه‌ری ده‌کرێن.
مەنسوور جیهانی له کۆتایی ئه‌م چاوپێکه‌وتنه‌دا جه‌ختی کرده‌وه: فێستیڤاڵی نێوده‌وڵه‌تی فیلمی کانی فه‌ره‌نسا، یه‌که‌مین په‌نجه‌ره‌ی گرینگی سینه‌مایی له جیهاندایه که به‌ره‌وڕووی سینه‌مای کوردستان و ئێران ده‌کرێته‌وه و ئه‌م هاوکارییه گرینگ و پڕبایخه؛ وه‌کوو خوله‌کانی رابردوو، له خوله‌کانی داهاتووشدا درێژه‌ی ده‌بێت.
ئەم هەواڵە 259جار خوێندراوەتەوە |
