2023-12-04 [08:00 AM]

بۆ یەکەمجار لە دوای ساڵی 2020 نرخی زێڕ ئاستێکی پێوانەیی تۆمار کرد و نرخی یەک ئۆنسە گەیشتە دو هەزار و 132 دۆلار.

ئەمڕۆ لەگەڵ کرانەوەی بازاڕدا نرخی هەر ئۆنسەیەک زێر لە دو هەزار و 65 دۆلارەوە بەرزبوەوە بۆ دو هەزار و 132 دۆلار و دواتر کەم بوەوە بۆ نزیکی دو هەزار و 90 دۆلار.

ئەو بەرزبونەوەیەی نرخی زێڕ بە پێوانەییەکی مێژویی دادەنرێت لەدوای ساڵی 2020 و سەرهەڵدانی ڤایرۆسی کۆڤید-19 کە ئەوکات نرخی هەر ئۆنسەیەک بە دو هەزار و 135 دۆلار مامەڵەی پێوە دەکرا.

لە ماوەی چەند هەفتەی رابردودا مامەڵەکردن بە زێڕەوە زیادی کردوە و هەر ئەوەش وای کردوە کە لە ماوەی کەمتر لە دو هەفتەدا زیاتر لە 100 دۆلار بەرزو نزمی لە نرخەکەیدا روبدات کە ئاڵۆزیەکانی نێوان ئیسرائیل و حەمماس لە کەرتی غەززە، بە یەکێک لە هۆکارەکان دادەنرێت.