|
هەولێر – ZNA به چاودێری حه‌مه‌ی حه‌مه‌سه‌عید، وه‌زیری ڕۆشنبیری و لاوانی حكومه‌تی هه‌رێمی كوردستان حه‌وته‌مین فێستیڤاڵی نێوده‌وڵه‌تیی
شانۆی شه‌قام له شاری كه‌ركووك به‌ڕێوه‌ده‌چێت.
بڕیاره فێستیڤاڵه‌كه ڕۆژانی (19، 20، 21ـی تشرینی دووه‌م/ نۆڤێمبه‌ری 2023)، به به‌شداری تیپه شانۆییه‌كانی (كوردستان، عێراق، سووریا، ئێران، جه‌زائیر، تونس و ئیتاڵیا) به‌ڕێوه‌بچێت.
به نوێنه‌رایه‌تی ئه‌و وڵاتانه بیست و چوار تیپ و گرووپی شانۆیی ده‌قه شانۆییه‌كانیان له كه‌ركووك نمایش ده‌كه‌ن.
له چوارچێوه‌ی چالاكییه‌كانی فێستیڤاڵه‌كه‌دا، جگه له نمایشی شانۆ، ڕێوڕه‌سمی ناساندن بۆ چه‌ند كتێبێك ده‌كرێت و هه‌شت شانۆكاری به ئه‌زموونیش به‌شداری پانێلێكی تایبه‌ت به هونه‌ری شانۆ و ئه‌زموونه‌كانیان له‌و بواره‌دا پێشكه‌ش ده‌كه‌ن.
ده‌ق و نمایشه شانۆییه‌كان و لێهاتوویی شانۆكاره‌كان له لایه‌ن چه‌ند لیژنه‌یه‌كی تایبه‌تمه‌نده‌وه هه‌ڵده‌سه‌نگێندرێن و خه‌ڵات به‌سه‌ر باشترین ئه‌كته‌ری كوڕ و كچ و باشترین بیرۆكه و به‌رهه‌م و ده‌رهێنه‌ر دابه‌ش ده‌كرێت.
به‌ڕێوه‌چوونی فێستیڤاڵه‌كه دوای ئه‌و هه‌وڵانه دێت، كه وه‌زیری ڕۆشنبیری و لاوانی حكومه‌تی هه‌رێمی كوردستان خستیه‌گه‌ڕ له پێناو به‌رده‌وامیدان به خوله‌كانی فێستیڤاڵی نێوده‌وڵه‌تی شانۆی شه‌قام له كه‌ركووك و سه‌رخستنی فێستیڤاڵه‌كه.
ئەم هەواڵە 157جار خوێندراوەتەوە |
