|
هەولێر – ZNA لە سێیەم و كۆتا رۆژی چالاكییەكانی فێستیڤاڵی نێودەوڵەتی شانۆی شەقام لە كەركووك، لە هۆڵی سەنتەری رۆشنبیری كەركووك خەڵات بەسەر براوەكانی فێستیڤاڵدا دابەشكرا.
لە رێوڕەسمی دابەشكردنی خەڵاتەكاندا، دەلیل جەمال، بەڕێوبەری نووسینگەی وەزیری رۆشنبیری و لاوانی حكومەتی هەرێمی كوردستان لە وتەیەكدا سوپاس و پێزانینی وەزارەتی بۆ تیپە بەشداربووەكان و لیژنەی سەرپەرشتیاری فێستیڤاڵەكە دووپات كردەوە و رایگەیاند، وەزارەتی رۆشنبیری و لاوان پشتیوانی سەرەكی هەموو ئەو چالاكییە رۆشنبیری و هونەری و كولتووریانە دەبێت، كە لە خزمەتی پێشخستنی زیاتری كایەی رۆشنبیری و كولتووری و قووڵكردنەوەی گیانی بەیەكەوەژیانی ئاشتیانەن.
دواتر لیژنەی داوەری فێستیڤاڵەكە لیستی ناوی براوەكانی فێستیڤاڵیان راگەیاند و خەڵاتی فێستیڤاڵ پێشكەش بە براوەكان كرا.
خه‌ڵاتی باشترین ئەکتەری ئافرەت به هاوبەشی پێشكەشكرا بە "نادیە ئیلاهی، نازیلی ئەمینی".
خه‌ڵاتی باشترین ئەکتەری کوڕ پێشكەشی "دارا عزەدین"، لە تیپی نمایشی هەزەی نیشتیمانی كرا.
خه‌ڵاتی باشترین بیرۆکە، بەخشرایە "لوقمان عومەر"، لە تیپی شانۆیی هەزەی نیشتیمانی.
خه‌ڵاتی باشترین ده‌رهێنان پێشكەشی هەریەك لە "هوشیار قەوامی و فەرەیدون ئەحمەدی" لە تیپی شانۆیی جێژوان كرا.
خه‌ڵاتی باشترین بەرهەمی كامڵی فێستیڤاڵ پێشكەشی تیپی شانۆی جێژوان كرا.
خەڵاتی لیژنەی دادوەری پێشكەش بە تیپی "شانۆیی سەما" كرا.
خه‌ڵاتی باشترین نمایشی منداڵان پله‌ی دووه‌م، بەخشرایە نمایشی شانۆی "ئۆلیڤەری چڵمن".
خەڵاتی باشترین نمایشی منداڵان پله‌ی یەکەم، بەخشرایە دەقی شانۆیی "ئەفسونەکەی کاتی و کالی".
خەڵاتی باشترین نمایشی زانكۆكان پله‌ی دووەم بەخشرایە "شانۆیی تەپەگوز".
خەڵاتی باشترین نمایشی زانكۆكان پله‌ی یەکەم، بەخشرایە تیپی "شانۆی زەنگ".
فێستیڤاڵی نێودەوڵەتی شانۆیی سورەی تاران نمایشێکی شانۆیی وەرگرت، "شانۆیی موسافرێک لە غەزەوە".
فێستیڤاڵی نێودەوڵەتی شانۆیی مەریوان دوو نمایشی شانۆیی وەرگرت "شانۆیی زەنگ / هەولێر ، شانۆیی هەزەی نیشتیمانی /کەرکووک".
حەوتەم فێستیڤاڵی شانۆی شەقام لە كەركووك رۆژی یە‌كشه‌ممه 19ـی تشرینی دووه‌می 2023 دەستیپێكرد و سێ رۆژی خایاند و ئێوارەی سێشەممە 21ـی تشرینی دووەم نكۆتایی بە كارەكانی هێنا.
حه‌مه‌ی حه‌مه‌سه‌عید، وه‌زیری ڕۆشنبیری و لاوانی حكومه‌تی هه‌رێمی كوردستان، ئاماده‌ی رێوڕه‌سمی ده‌ستپێكردنی حه‌وته‌م فێستیڤاڵی شانۆی شه‌قام بوو، له وتارێكدا، كه له سه‌نته‌ری رۆشنبیری كه‌ركووك پێشكه‌شیكرد، رایگه‌یاند، کەرکووک شارێکی کوردستانی، شاری نەتەوە جیاجیاکانە، شاری ئاشتی و پێکەوە ژیانە و وەزارەتی رۆشنبیری و لاوان یەکێک لە ئەرکە سەرەکییەکانی پشتیوانی و خزمەتی شانۆ و زەمینەسازییە بۆ شانۆکاران، بەتایبەت لە کەرکووک.
ئەم هەواڵە 172جار خوێندراوەتەوە |
