2023-12-31 [10:09 AM]

بەپێی ئاماری نووسینگەی سەرژمێری ویلایەتە یەکگرتووەکانی ئەمەریکا لە یەکەم ڕۆژی ساڵی 2024، ژمارەی دانیشتوانی جیهان دەگاتە زیاتر لە هەشت ملیار کەس.

بە پێی ئەو ڕاپۆرتە ژمارەی دانیشتوانی جیهان لەمساڵدا بۆ 75 ملیۆن کەس زیادی کردووە.

نووسینگەی سەرژمێری ئەمەریکا دەڵێت ڕێژەی گەشەی جیهانی ئەمساڵ کەمێک لە خوار 1% بووە. بەپێی ئامارەکانی نووسینگەی سەرژمێری، لە سەرەتای ساڵی 2024ەوە، لە هەر لە هەر 10چرکەدا، 43 حاڵەتی لەدایک بوون و 20 حاڵەتی مردن لە جیهاندا تۆمار دەکرێت.

ڕێژەی گەشەی دانیشتوانی ئەمساڵ لە ئەمەریکا 0.53% بووە و یەک ملیۆن و 700 هەزار کەس بۆ دانیشتوانی ئەو وڵاتە زیاد کراوە. بەم شێوەیە ژمارەی دانیشتوانی ئەمەریکا لە ساڵی 2024دا دەگاتە 335.8 ملیۆن کەس.

لە ساڵی 2024ەوە پێشبینی دەکرێت لە ئەمەریکا لە هەر 9 چرکەیەدا منداڵێک لەدایکبێت و لە هەر 9.5 چرکەیەکدا حاڵەتێکی مردنیش ڕووبدات. بەڵام بەپێی ڕاپۆرتی نووسینگەی سەرژمێری، کۆچی خەڵک لە وڵاتانی دیکەوە بۆ ئەمەریکا ڕێگری لە کەمبوونەوەی ژمارەی دانیشتووانی ئەو وڵاتە دەکات.