English | عربی | Kurdî دواهەواڵ
ڕاستەوخۆ  
 
تورکیا 33 کەسی له‌سه‌ر سیخوڕیکردن بۆ ئیسرائیل دەستگیر كرد
2024-01-02 [03:45 AM]

ZNA - هه‌ولێر


 

عەلی یەرلیکایا وەزیری ناوخۆی تورکیا ڕایگەیاند، ئه‌مڕۆ سێشەممە 33 کەسی بە گومانی پلانی ڕفاندن و سیخوڕیکردن بۆ دەزگای هەواڵگری مۆسادی ئیسرائیلی ده‌ستگیر كرد، وتیشی، تۆمەتباران لە هەڵمەتێکدا لە سەرانسەری هەشت پارێزگا لە ئەستەنبوڵ و دەوروبەری دەستگیرکراون.

ئه‌وه‌ روون نه‌كراوه‌ته‌وه‌ ئەوانەی دەستگیرکراون خەڵکی ئیسرائیلن یان خەڵکی توركیان گوایە لەگەڵ مۆساددا کاردەکەن.

یەرلیکایا لە تۆڕە کۆمەڵایەتییەکاندا ڕایگەیاندووە "ئێمە هەرگیز ڕێگە نادەین چالاکیی سیخوڕی لە دژی یەکێتی نەتەوەیی و هاوسۆزی وڵاتەکەمان ئەنجام بدرێت."

نووسینگەی یەرلیکایا گرتەیەکی ڤیدیۆیی بڵاوکرووەتەوە کە تیایدا نیشان دەدرێت ئەندامەکانی هێزەکانی ئاسایش بە چەکەوە دەرگاکان دەشکێنن و تۆمەتباران لە ماڵەکانیاندا قۆڵبەست دەکەن.

داواکاری گشتی ئەستەنبوڵ ڕایگەیاند، 13 تۆمەتباری دیکەش هەن کە هێشتا دەستگیر نەکراون.

پەیوەندییەکانی نێوان تورکیا و ئیسرائیل بەهۆی سەرهەڵدانی شەڕی ئیسرائیل و حەماس لە نزیکەی سێ مانگ لەمەوبەرەوە تێکچووە.

ڕەجەب تەیب ئەردۆغان، سەرۆک کۆماری تورکیا بووە بە یەکێک لە توندترین ڕەخنەگرانی بنیامین نەتانیاهۆ، سەرۆک وەزیرانی ئیسرائیل، لە جیهاندا.

ئەردۆغان لە هەفتەی ڕابردوو نەتانیاهۆی بەراورد کرد بە ئەدۆلف هیتلەر و داوای کرد هاوپەیمانە ڕۆژئاواییەکانی ئیسرائیل کۆتایی بە پشتیوانی خۆیان بۆ "تیرۆر"، کە لەلایەن سەربازانی ئیسرائیلەوە بەڕێوەدەچێت، بهێنن.

ئەردۆغان هەروەها نوێنەری ئانکەرەی لە تەلئەبیب بانگهێشت کردووەتەوە و داوای دادگاییکردنی سەرکردە سەربازی و سیاسییەکانی ئیسرائیل دەکات لە دادگای باڵای نێودەوڵەتی لاهای.

نەتانیاهۆ ش وەلامی قسەکانی داواتەوە و دەڵێت "پێویستە سەرۆک کۆماری تورکیا دوا کەس بێت ئیسرائیل نەسیحەت بکات."

نەتانیاهۆ لە بەیاننامەیەکدا دەڵێت "ئەردۆغان کە جینۆساید لە دژی کورد ئەنجام دەدات، خاوەنی ژمارەی پێوانەیی جیهانییە لە زیندانیکردنی ئەو ڕۆژنامەنووسانەی دژایەتی دەسەڵاتەکەی دەکەن، دوا کەسە کە بتوانێت باسی ئەخلاق بۆ ئێمە بکات."

 

voa





ئەم هەواڵە 232جار خوێندراوەتەوە
 
 
ڤیدیۆ گەلەری
گۆلچی هامبۆرگ گۆلێكی ده‌گمه‌ن له‌ خۆی ده‌كات
گۆڵێكی سه‌یر له‌لایه‌ن گۆڵچیه‌وه‌
گڕكانی مایۆن له‌ فلپین
ئه‌سپێك ره‌دووی ئه‌مبولانسێك ده‌كه‌وێت كه‌ برایه‌كه‌ی له‌ناودایه‌
لە شەقامێکی قەرەباڵغ منداڵێک لە سندوقی ئۆتۆمبێل دەکەوێتە خوارەوە
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad