|
نڤیسینا:غیاس خالد زێبارى ئه‌ڤه ده‌مه‌كه جار جار وه‌لاتێ ئیرانێ یێ جیران ب درۆن و مۆشه‌كان هێرش دكه‌ته سه‌ر هه‌ولێرا پایته‌ختێ هه‌رێما كوردستانێ، لدووماهى جار شه‌ڤا ده‌ربازبووى 15ــ16/1/2024 چه‌ندین جهێن هه‌ولێر و ده‌وروبه‌ر مۆشه‌ك باران كرن، ژبلى زیانێن ماددى ژماره‌كا سڤیلا هاتنه شه‌هید و بریندار كرن، ڤێ جارێ ژى مینا هه‌ر جار رژێما ئیرانێ گۆت" مه بنگه‌هێن مۆسادا ئسرائیلێ و لایه‌نگرێن وان مۆشه‌كباران كرنه"
پسیار بۆ رژێما ئیرانێ، ئه‌رێ ماڵێن وه‌لاتیێن سڤیل، باره‌گه‌هێ سیخوڕیێ یه..؟ ئه‌رێ زارۆیێ نه‌هــ هه‌یڤى یێ هاتیه شه‌هیدكرن چ ل سیخوریێ دزانیت...!
رژێما ئیرانێ و هه‌مى خه‌لك و وه‌لات دزانن ئه‌ڤا ئیران ده‌رهه‌قى هه‌رێما كوردستانێ دكه‌ت چ په‌یوندى ب ئسرائیل و سیخۆریێ نینه و به‌هانه‌یێ، وان دویرى راستیێ نه، تنێ داخ و كه‌سه‌را وان ئه‌وه هه‌ولێر و حكومه‌تا هه‌رێما كوردستانێ ب بریار و ستراتیژیه‌كا خۆ یا سه‌ربه‌خۆ بۆ خزمه‌تا گه‌ل و وه‌لات خۆ كار دكه‌ت و نه‌كه‌فتیه و ناكه‌ڤینه بن ئه‌جندا و كاریگه‌ریا ئیرانێ مینا گرووپێن چه‌كدارێن ئیراقى یێ دژى یاسایێ و چه‌كدار و رێكخستنێن تایبه‌ت ل وه‌لاتێ، سووریا و لوبنان و فه‌له‌ستین و یه‌مه‌ن، كۆ ژبووى به‌رژه‌وه‌ند و ده‌ستكه‌فتێن تایبه‌ت بریار و رێنمایا ل وه‌لاتێ ئیرانێ وه‌ربگرن و دژایه‌تیا خه‌لك و وه‌لاتێ خۆ بكه‌ن...!
ئه‌ڤا ئیران ده‌رهه‌قى هه‌رێما كوردستانێ دكه‌ت، ره‌گه‌زپه‌رستیا دوژمنكارانه‌یه دژى مافێن نه‌ته‌وەیى و نشتیمانى یێن خه‌لكێ كوردستانێ و وێ پێشكه‌فتنا هه‌رێمێ و هه‌ولێرێیه، ئه‌گه‌ر كوردستان ئسرائیلا بچووك با دا هه‌ولێرا پایته‌خت مینا ته‌لئه‌ڤیڤا پایته‌ختێ ئسرائیل یا ئێمن و سه‌قامگیر بیت و ئیرانێ و دیڤه‌لانكێن وان وێره‌كى نه‌دبوو ب چاڤێ غه‌ره‌زێ به‌رێ خۆ بده‌نێ و به‌ره‌كى ژى ئاراسته بكه‌ن، نه‌ك مۆشه‌ك و درۆنا..! ئه‌گه‌ر كوردستان ئسرائیلا بچووك با، ئه‌مریكا و هێزێن هه‌ڤپه‌یمان دا به‌ڕه‌ڤانیێ لێ كه‌ن و ژ تۆلا وێ دا جه‌رگێ پایته‌ختێ ئیرانێ د ئاگرى وه‌ركه‌ن..! لێ هه‌ولێر پایته‌ختێ كوردستانێ و كانگه‌ها كوردستانیبوونێ و ئازادى و پێكڤه ژیانێیه، ئه‌وما چاڤێن نه‌یار و دوژمنا پێ رانابن.
جهێ مخابنیێ ئه‌وه هه‌تا نوکە ده‌وله‌تا ئیراقێ ب هه‌مى سازیێن ده‌ستهه‌لاتداریێ ڤه چ هه‌لویستێن پێتڤى به‌رامبه‌ر ڤان پێشێلكاریێن ئاشكرا یێن دژى سه‌روه‌ریا وه‌لاتا و مایتێكرنێن ده‌رڤه‌یى نینه، ماده‌م هه‌رێما كوردستانێ به‌شه‌كێ ئیراقێیه، سه‌روه‌ریا وێ ژى سه‌روه‌ریا ئیراقێیه و ئه‌ركێ ده‌وله‌تا ئیراقێیه هه‌لویستێن تۆند و بله‌ز به‌رامبه‌ر ڤان پێشێلكاریێن ئیرانێ هه‌بن و سكالایا خۆ بگه‌هینه سازیێن ناڤده‌وله‌تى، چونكى ئه‌ڤه سه‌رپێچیێن قانوونێن ناڤه‌ده‌وله‌تینه، لسه‌ر ئاستێ ناڤخۆیێ هه‌رێما كوردستانێ ژى، ل سۆشیال میدیایا نێزیك ل لایه‌نه‌كێ سیاسى بێ هه‌لویستى به‌رامبه‌ر دوژمنكارای ئیرانێ به‌رامبه‌ر هه‌ولێر و كوردستانێ هه‌یه و ره‌نگه د هنده‌ك پۆستێن واندا به‌هانه‌یێن قانوونى بۆ ئیرانێ ڤه‌دیتنه..! ئه‌ڤ هه‌لویستێ وان ژبلى شه‌رمزاى و روڕه‌شیێ چ ده‌ستكه‌فتا بۆ وان پاش خۆ ناهێلیت و بلا بزانن كۆ هێز و سه‌قامگیریا هه‌ولێرێ هێز و سه‌قامگیریا وانه.
ئه‌گه‌ر ئیران راست بێژیت دژى ده‌وله‌تا ئسرائیلێیه، گه‌ز و مقه‌سێن د ده‌ستێ وێ دا و ده‌ستهه‌لاتا وێ میلیشیایێن وان لسه‌ر سنوورێن ئسرائیلێ نه ل سووریا و لبنان و فه‌له‌ستین.
ئیران ژى باش دزانیت هه‌ولێر و هه‌رێما كوردستانێ د ده‌سته‌كێ ئه‌مین دایه و بڤان درۆن ومۆشه‌كا نه ژناڤ دچیت و نه خۆ بۆ دچه‌مینیت، ئه‌ڤا نوکە ئیران دكه‌ت تنێ پڕ و پاگنده‌نه و هه‌بوونا خۆ دیار دكه‌ت.
خه‌لكێ كوردستانێ و سه‌ركردایه‌تیا وێ خۆدان ئیراده و باوه‌رى بخۆبوونن و ره‌وشێن زۆر دژوارتر ده‌رباز كرینه و د زانن چه‌وا بسه‌ر ئاسته‌نگا زال ببن و سه‌ره‌ده‌ریێ لگه‌ل ره‌وشێن سیاسى و ئێمناهى دا بكه‌ن و هه‌ولێر هه‌ر هه‌ولێرا ئارام و سه‌قامگیرا پایته‌ختێ كوردستانێ یه.
ئەم هەواڵە 556جار خوێندراوەتەوە |
