2019-11-25 [11:27 AM]

سەنا بەرزنجی، خانمە گۆرانیبێژی کورد، بۆ یەکەمجار وێنەیەکی خۆی لە تۆڕێکی کۆمەڵایەتیدا بڵاو کردەوە.

بەرەبەیانی ئەمڕۆ دووشەممە ٢٥/١١/٢٠١٩، سەنا بەرزنجی یەکەمین وێنەی خۆی، لە ھەژماری تایبەتیی خۆی، لە تۆڕی کۆمەڵایەتیی (ئینستاگرام) بڵاو کردەوە، لەسەر وێنەکەشدا نووسیویەتی: "یەکەمین وێنەی فەرمیی من".

وەک لە وێنەکەدا دیارە، سەنا بەرزنجی ماسکێکی بۆ شاردنەوەی چاوەکانی داناوە، ھەروەھا ئاماژەی بەوە داوە، کاتژمێر ٨ی ئەمشەو، نوێترین ڤیدیۆ کلیپی گۆرانیی خۆی بە ناوی (ھەر ئەگەڕێم) بڵاو دەکاتەوە.

سەنا بەرزنجی خەڵکی ڕۆژھەڵاتی کوردستانە، لە ماوەی ڕابردوودا گۆرانییەکی بە شێوەی دوێت لەگەڵ نەوید زەردی بڵاو کردەوە، پێشتر بەشێوەی دەنگ لە تۆڕە کۆمەڵایەتییەکاندا گۆرانییەکانی بڵاو کردووەتەوە.

بڕیار وایە ١٢/١٢/٢٠١٩، سەنا بەرزنجی یەکەمین ئەلبوومی گۆرانیی خۆی بڵاو بکاتەوە.